★ الشواف ★
بعوناتي شفتو يعزم
ويبرگم ويعلن
ؤ سمعتو بهاذ لوذن
يقول ويزيد فالقول
قلالت لمروة
وجهالة شخدات فلعقول
لمنازل تخبلات
ؤ خلطات لفصول
لكحط والشوم
بدا ياكل لحقول
لخريف ولى ربيع
والصيف شتا
الحر ولى صقيع
ولغمام صفا
لوجوه مسگومة صفرة
نهارها قصار بالحسرة
وليلها طال وزاد طال
لوطا سرج جبال
وجبال نبتت فوق السهول
وقال وزاد فالقول
ليوم قبل غدا يالحباب
الخرفان تصاحبت مع الذياب
لحمام هجر لوكار وگرگر لغراب
والذبان ربح الانتخاب
ورانا لعجب العجاب
وقال وزاد فالقول
سلام سلام على النيام
فالليل ينصبو لخيام
بوتاد لحلام فحلك الظلام
هذا يحلم هذا يحكي هذا يفسر لمنام
هاذي ريح وهذا صهد
هاذي شتا وهذا رعد
هذا يرخف وهذا يشد
هذا يوقف وهذا يگعد
وقال زاد فالقول
الدومالي زاهي بسلعتو يتعفر
يبيع ويشري فجناح الليل حتى لفجر
هذا حوت سماوي
وهاذي بطاطة من لبحر
هذا لحم احمر يعكر
وهذا دجاج منقارو يهرس لحجر
وقال زاد فالقول
هذا بائع لينا لقوال
بشلا مال
وهذا بايع لينا لهبال
بالدهب المثقال
وحنا على هاذ الحال
وحالي وحالك
ما يشبه احوال
مرة فلوطا
ومرات فلعگبة ولجبال
مرة الخاطر يصفا
ومرات الهم ؤ لوجع يطوال.
★عبدالرحيم طالبة صقلي★
Comments
Post a Comment